Ազգային գրադարանային շաբաթի շրջանակում Հայաստանի գրադարանային ասոցիացիայի կողմից 2017թ. ապրիլի 21-ին՝ ժամը 13:00-ին, Օհան Չուբարյանի անվան Արարատի մարզային գրադարանում կազմակերպվեց «Գրադարանային հիմնախնդիրներ և լուծման որոնումներ» թեմայով կլոր սեղան-քննարկում: Գիտագործնական մասնագիտական հանդիպում-քննարկման ընթացքում խոսվեց գրադարանային գործունեությունն առավել թիրախային և նպատակային դարձնելու, համայնքային գրադարանների հիմնահարցերի, նորարարական մոտեցումների, գրադարանային սպասարկման արդյունավետության բարձրացման ժամանակակից հնարավորությունների, գրադարանավարների շարունակական փոխգործուն վերապատրաստումների և գրադարաններ այցելելու մշակույթ վերաձևավորելու անհրաժեշտության, ընթերցանության քանակական և որակական ցուցանիշների հնարավոր բարելավման, միջգրադարանային համագործակցության, գրադարանային այլ հիմնախնդիրների վերաբերյալ:
Գիտագործնական կլոր սեղան-քննարկմանը ներկա էին Գրադարանային ասոցիացիայի նախագահ Ռ. Տոնոյանը, փոխնախագահ Ռ. Ղազարյանը, Արարատի մարզային գրադարանի տնօրեն Վ. Պետրոսյանը, գրադարանային ոլորտի աշխատակիցներ Արարատի, Վեդու և Մասիսի համայնքային և մարզային գրադարաններից. Արարատի տարածաշրջանից՝ Գոռավանի և գյուղ Արարատի գյուղական համայնքային, Արարատի և Վեդու քաղաքային, Արտաշատի տարածաշրջանից՝ Բուրաստանի, Մասիսի, Մրգավանի գյուղական համայնքային և Արտաշատի քաղաքային, ինչպես նաև Մասիսի տարածաշրջանից՝ Սայաթ-Նովայի, Ռանչպարի, Այնթափի, Ջրահովտի գյուղական համայնքային և Մասիսի քաղաքային գրադարաններից:
Քննարկման ավարտին Հայկական գրադարանային ասոցիացիայի նախագահ Ռուզան Տոնոյանը մարզային գրադարանին նվիրեց անհրաժեշտ 25 միավոր գրականություն: