2004 թ. ՀՀ կառավարությունը հոկտեմբերի 7-ը՝ Հայկական գրադարանային ասոցիացիայի հիմնադրման օրը, ամրագրել է որպես Գրադարանավարի օր: ՀՀ-ում այն նշանավորվում է մասնագիտական և մշակութային բազմաթիվ միջոցառումներով:

Հարգելի «Լավագույն գրադարան» մրցույթի մասնակիցներ,
Հոկտեմբերի 7-ին, ժամը 12:00-ին սիրով հրավիրում ենք Հայաստանի ազգային գրադարան, մասնակցելու մրցույթի արդյունքների ամփոփման և մրցանակների հանձնման արարողությանը:

ՀՀ կրթության, գիտության, մշակույթի և սպորտի նախարարություն
Հայկական գրադարանային ասոցիացիա  ՀԿ

ՀՀ կրթության, գիտության, մշակույթի և սպորտի նախարարության աջակցությամբ Խնկո Ապոր անվան ազգային մանկական գրադարանի կողմից իրականացվող «Գրադարանավարների վերապատրաստման դասընթացներ» ծրագրի շրջանակում սեպտեմբերի 15-17-ը և սեպտեմբերի 22-24-ը ՀՀ Արարատի և Կոտայքի ՝ մարզային և համայնքային գրադարանների 45 աշխատողների համար անցկացվել են եռօրյա գործնական պարապմունքներ: Դասընթացների մասնակիցներն առցանց ձևաչափով անցել էին տեսական դասընթացի փուլը:
Պարապմունքները վարում էին Խնկո Ապոր անվան ազգային մանկական գրադարանի փորձառու մասնագետները: Ծրագրում ներառված էին գրադարանային գործի տարբեր գործառույթների վերաբերյալ տեսական գիտելիքներն ամրապնդող գործնական պարապմունքներ և էքսկուրսիա գրադարանի բոլոր բաժիններով:
Ավարտին մասնակիցներն ստացել են վկայականներ:

Ավարտվեցին ՀՀ կրթության, գիտության, մշակույթի և սպորտի նախարարության աջակցությամբ Խնկո Ապոր անվան ազգային մանկական գրադարանի կողմից իրականացվող Գրադարանավարների վերապատրաստման դասընթացները՝ ՀՀ մարզերի և համայնքների գրադարանների աշխատակիցների համար: Դասընթացներն անցկացվեցին 2021թ.-ի հուլիսի 12-28-ը առցանց ձևաչափով ՀՀ Կոտայքի և Արարատի մարզերի 45 գրադարանավարների համար:  Պարապմունքները վարում էին հանրապետության փորձառու մասնագետները: Ծրագիրը ներառում էր 11 թեմա, որոնց շրջանակում դասընթացավարները  գրադարանային գործի տարբեր գործառույթների վերաբերյալ փոխանցում էին համապատասխան գիտելիքներ և գործնական հմտություններ:
Դասընթացների մասնակիցները ստացած գիտելիքները, մասնագիտական հմտությունների կիրառման նոր գործիքակազմն ու մեթոդները կփոխանցեն իրենց գործընկերներին: Սեպտեմբերին մասնակիցները Խնկո Ապոր անվան ազգային մանկական գրադարանում կմասնակցեն գործնական պարապմունքների, որից հետո կստանան վկայականներ:

ՀՀ կրթության, գիտության, մշակույթի և սպորտի նախարարության աջակցությամբ «Հայկական գրադարանային ասոցիացիա» հասարակական կազմակերպությունը հայտարարում է մրցույթ՝ «Լավագույն գրադարան» անվանակարգում:
«Լավագույն գրադարան» մրցույթի նպատակն է գրադարանների հանրայնացումը, լավագույն աշխատանքների խրախուսումը, գրադարանի և գրադարանավարի դերի կարևորումը, գրադարանային ոլորտի զարգացման խթանումը, ծառայությունների որակի բարելավումը, ընթերցանության խթանմանը միտված նորարարական գաղափարների ներդրումը:

• Մրցույթին կարող են մասնակցել ՀՀ-ում գործող բոլոր գրադարանները
• Մրցույթին ներկայացված հայտերը գնահատում է մասնագիտական հանձնաժողովը:
• Մրցույթն անցկացվում է չորս փուլով.
  *Հայտերի ընդունում
  * Հայտերի քննարկում և գնահատում
  *Արդյունքների ամփոփում
  *Մրցանակների հանձնում
• Մրցույթն անցկացվում է հետևյալ անվանակարգերում.

1. «Լավագույն համայնքային գրադարան»

2. «Լավագույն մարզային գրադարան»

3. «Լավագույն նորարար գրադարան»

4. «Լավագույն գիտակրթական գրադարան»

5. «Լավագույն մասնագիտական գրադարան»

Մրցույթի մասնակցության հայտերը և պահանջվող փաստաթղթերն անհրաժեշտ է ուղարկել «lavaguyngradaran@gmail.com» հասցեին մինչև 2021թ. օգոստոսի 20-ը ներառյալ:
Հաղթող գրադարանները կպարգևատրվեն հատուկ մրցանակներով:
Պարգևատրման արարողությունը տեղի կունենա Հայաստանի ազգային գրադարանում, 2021 թվականի հոկտեմբերի 7-ին՝ Գրադարանավարի օրը:
«Լավագույն գրադարան» մրցույթի մասնակցության հայտաձևը և կարգը կից՝

Հայտաձև

Կարգ

2021 թ.-ի հունիսի 30-ին Խնկո Ապոր անվան ազգային մանկական գրադարանը Ղազախստանի Հանրապետության Ազգային ակադեմիական գրադարանի հրավերով մասնակցել է «Մանկական գիրքը. հեղինակից ընթերցողին» խորագրով միջազգային առցանց համաժողովին: Ղազախստանի մշակույթի և սպորտի նախարարության աջակցությամբ իրականացվող համաժողովին մասնակցում էր աշխարհի 18 երկիր. ԱՄՆ-ից, Եվրոպայից, նախկին ԱՊՀ երկրներից: Ելույթները հարցադրումներով պարբերաբար ընդհատվում էին համաժողովի մոդերատորի կողմից:
Խնկո Ապոր անվան ազգային մանկական գրադարանի օտարալեզու գրականության բաժնի վարիչ Գայանե Իսրայելյանը ներկայացրել է «Մանկական գրադարանը կապող օղակ է հեղինակի և ընթերցողի միջև» զեկույցը, որը կհրապարակվի համաժողովի կայքէջում:
Համակարգող ղազախուհու հարցադրումներին ի պատասխան՝ խոսվել է Հայաստանում մանկապատանեկան ընթերցանության և գրադարանային համայնքի կողմից մանկական ընթերցանության զարգացման ուղիների վերաբերյալ:
Կազմակերպիչների կողմից հատուկ ընդգծվել է հայկական կողմի ելույթի կառուցողական և խիստ մասնագիտական բնույթը. ասվել են դրվատանքի խոսքեր հայկական հնագույն մշակույթի մասին:
Հայկական մանկական գիրքը ներկայացնում էր նաև մանկագիր Սաթենիկ Ղազարյանը:
Մասնակիցները՝ մանկագիրներ, գրադարանային ոլորտի աշխատողներ, գրողներ, խոսում էին իրենց երկրներում մանկական գրականության ոլորտի աշխատանքների մասին, մասնակցում էր նաև ԻՖԼԱ-ի ներկայացուցիչը:
Առաջարկվում էին տարաբնույթ մեթոդներ, օրինակ՝ Մոսկվայի Ախմատովայի անվան Smart գրադարանի տնօրենն առաջարկել է սկսել սերտ փոխգործակցություն ժամանակակից գրողների միջև: Առաջարկվել է կապվել «Անարա» (Ղազախստանի Հանրապետության Ազգային ակադեմիական գրադարան) գործակալության հետ, որը արդյունավետ աշխատում է գրքի քարոզչության գործում:

Գրքահավաք

Սիրելի՛ հայրենակից
Հարգելի՛ գործընկեր
44-օրյա պատերազմի արդյունքում այլ ենթակառուցվածքային կորուստների հետ մեծ վնասներ է կրել նաև Արցախի Հանրապետության գրադարանային համակարգը. 127 կենտրոնական և դպրոցական գործող գրադարան՝ շուրջ 650000 գրքային ֆոնդով դուրս են մնացել Արցախի վերահսկողությունից՝ դադարելով ծառայել իրենց նպատակին:
Հայկական գրադարանային ասոցիացիան և Հայաստանի հրատարակիչների ազգային ասոցիացիան Հայաստանի Հանրապետության և Արցախի Հանրապետության կրթության, գիտության, մշակույթի և սպորտի նախարարությունների աջակցությամբ, գիտակցելով, որ այսօր հատկապես ազգային ինքնության պահպանման և երիտասարդ սերնդի ինքնագիտակցության բարձրացման գործում աներկբա է գրադարանների կայուն և արդյունավետ գործունեությունը, ի զորակցություն Արցախի բնակչության նախաձեռնել են «Գիրքը Արցախին սպեղանի» խորագրով գրքահավաք, որը քայլ է մեղմելու գրքային հավաքածուի կորուստը և կարևոր է հետպատերազմյան Արցախի կրթամշակութային կյանքի ակտիվացման ու համաչափ զարգացման առումով:
Արցախցի մեր հայրենակիցների գրքասպասարկման գործընթացին օժանդակելու նպատակով Դուք ևս կարող եք ունենալ Ձեր ներդրումը, որը հնարավորություն կստեղծի վերականգնելու կորսված գրադարանային հավաքածուն:
Ուստի ակնկալում ենք Ձեր մասնակցությունը գրքահավաքին:
Կանխավ հայտնում ենք մեր երախտագիտությունը:
Խնդրում ենք գրքերը հանձնել ստորև բերված հասցեով, փաթեթի վրա նշելով անհատ նվիրատուի կամ կազմակերպության տվյալները։

Հասցե՝ 0001, Երևան, Տերյան փող., 42/1 շենք,Խնկո Ապոր անվան ազգային մանկական գրադարան, հեռախոս՝ 010 521222

Ծանուցում. գրքահավաքին կարող եք մասնակցել նվիրաբերելով գրքեր  ըստ ստորև ներկայացված  թեմատիկ ուղղությունների.

• գրականագիտական
• լեզվաբանական
• Հայ ժողովրդի պատմություն
• Արցախի պատմությանը նվիրված
• ուսումնա-մեթոդական
• գեղարվեստական
• տնտեսագիտական
• իրավագիտական
• տեխնոլոգիական
• մանկական

Հայկական գրադարանային ասոցիացիան և Քաղաքացիական հասարակության ինստիտուտը Ազգային գրադարանային շաբաթվա շրջանակներում կազմակերպում են առցանց միջոցառումներ՝ նվիրված 20-րդ դարի ամենաազդեցիկ գրքերից մեկի հեղինակին՝ Աննը Ֆրանկին։ Ընդամենը տասնհինգ տարեկան աղջնակը կյանքի երկու տարին ստիպված է եղել անցկացնել մեկուսացման մեջ՝ պատսպարվելով նացիստական արհավիրքից։ Դժվար այդ տարիներին Աննըն չի կորցրել ոգու տոկունությունը, զբաղվել է ինքնակրթությամբ, կարդացել ու գրել՝ վարելով օրագիր, որը իրենից հետո հրապարակվել է, թարգմանվել վաթսունից ավելի լեզուներով ու տարածվել տասնյակ միլիոնավոր օրինակներով՝ անմահացնելով «Աննը Ֆրանկ» անունը պատմության մեջ։

Աննը Ֆրանկի օրագիրըհայերեն առաջին անգամ թարգմանվել է 1962 թվականին։ 2019 թ․-ի հունիսի 12-ին՝ Աննըի 90-րդ տարեդարձին, լույս է տեսել բնագրից՝ հոլանդերենից, առավել համապարփակ թարգմանությամբ հրատարակությունը, որը կրում է «Հետնատունը» անունը (այսպես էր Աննըն կոչել իրենց թաքստոցը և նույնկերպ վերնագրել օրագիրը)։ Գրքի թարգմանիչը հոլանդուհի Աննա Մարիա Մատտաարն է։

2019-2020 թվականներին Հայաստանի բազում գրադարաններում այս առթիվ անց են կացվել թեմատիկ շաբաթներ՝ նվիրված Աննը Ֆրանկին ու նրա «Հետնատունը» գրքին։ Աննը Ֆրանկին է նվիրվում նաև 2020 թվականի ապրիլի 13-20-ը անց կացվող Ազգային գրադարանային շաբաթը։ Չնայած արտակարգ իրավիճակին՝ կազմակերպիչների կողմից որոշվել է չհետաձգել ծրագրով նախատեսված միջոցառումները, այլ իրականացնել դրանք օնլայն ձևաչափով, քանի որ խնդիրները, որ արծարծվում են խիստ զգացմունքային այս գրքում, ցավոք, արդիական են այսօրվա համատեքստում։

Ծրագիրը իրականացվում է Հայաստանում և Վրաստանում Նիդերլանդների դեսպանության ֆինանսական աջակցությամբ։