2004 թ. ՀՀ կառավարությունը հոկտեմբերի 7-ը՝ Հայկական գրադարանային ասոցիացիայի հիմնադրման օրը, ամրագրել է որպես Գրադարանավարի օր: ՀՀ-ում այն ավանդաբար նշանավորվում է մասնագիտական և մշակութային բազմաթիվ միջոցառումներով: Այս տարի ևս հոկտեմբերի 7-ին՝ Հայաստանի և Արցախի գրադարաններում  մասնագիտական տոնի առթիվ օրվա  բովանդակությանը համապատասխան  կիրականացվեն բազմաբնույթ միջոցառումներ, որոնք հերթական անգամ կկարևորեն գրադարանավարի հին մասնագիտությունը և նրա ավանդը ընթերցանության խթանման և գրքի արժևորման գործում:

Հայկական գրադարանային ասոցիացիա ՀԿ-ն IBBY Հայաստան ՀԿ-ի (Մանկապատանեկան գրքի միջազգային կոմիտեի հայաստանյան մասնաճյուղ) հետ համատեղ 2017 թ. հուլիսի 5-7- ը անցկացնելու է «Մանկապատանեկան ընթերցանության կազմակերպումը գրադարաններում» թեմայով վարպետության դասընթաց: Վարպետության դասը կվարի Լիոնի /Ֆրանսիա/ քաղաքային գրադարանի մանկապատանեկան գրականության բաժնի վարիչ Վիոլին Կանմաչերը: Դասընթացը կիրականացվի ֆրանսերենից հայերեն համաժամանակյա թարգմանությամբ: IBBY Հայաստան ՀԿ-ի իրազեկման հիման վրա կմասնակցեն 20 գրադարանավար (համամասնաբար 10-ը՝ ՀՀ մարզային և 10-ը՝ մայրաքաղաքային ու համայնքային տարբեր գրադարաններից): Թիրախավորված են մանուկներին և պատանիներին սպասարկող գրադարանավարները: Դասընթացի նպատակն է, ի նպաստ ՀՀ-ում գրադարանային գործի զարգացման, գրադարանավարներին փոխանցել մանկապատանեկան ընթերցանության կազմակերպման և այդ տարիքային խմբի գրադարանային սպասարկման նոր հմտություններ և գիտելիքներ՝ նրանց իրազեկելով նորարարական փոխգործուն, համագործակցային, նախաձեռնողական գործելաոճի ակտուալ առանձնահատկություններին: Նախաձեռնության դինամիկ արդյունավետությունն ապահովելու համար գրադարանավարները դասընթացում ստացած նոր գիտելիքները, կարողություններն ու հմտությունները գործնականում պետք է կիրառեն նշյալ տարիքային խմբի հետ աշխատանքում՝ այն ժամանակակից պահանջներին համապատասխանեցնելու նպատակով: Դասընթացը կմեկնարկի հուլիսի 5-ին՝ ժամը 10-ից, Խնկո Ապոր անվան ազգային մանկական գրադարանում:

2017թ. Ազգային գրադարանային շաբաթն ամփոփվեց, որին ՀԳԱ նախաձեռնությամբ իրենց առանձին ծրագրերով մասնակցեցին ՀՀ բազմաթիվ գրադարաններ՝ անկախ գերատեսչական պատկանելությունից:
Մասնագիտական-մշակութային շաբաթն ազդարարեցին և նրան անդրադարձան մի շարք լրատվամիջոցներ.

Հայաստանի Ազգային գրադարանային շաբաթը նվիրվում է Հայոց բանակի 25 ամյակին
http://ditaket.am/2017/04/19/18/02/18

Մեկնարկել է Ազգային գրադարանային շաբաթը՝ «Հայոց բանակ 25» խորագրի ներքո
https://news.am/arm/news/385403.html

Երևանում անցկացվում է Ազգային գրադարանային շաբաթ
http://culture.am/hy/գիր-և-տպագրություն/ազգային-գրադարանային-շաբաթ

Հայկական գրադարանային ասոցիացիան ապրիլի 17-23-ը ՀՀ-ում անցկացնում է Ազգային գրադարանային շաբաթ, որն այս տարի նվիրվում է Հայոց բանակի կայացման 25 ամյակին
http://www.panorama.am/am/shortNews/2017/04/19/Հայկական-գրադարանային-ասոցիացիա/1066063

Մեկնարկել է Ազգային գրադարանային շաբաթը
http://orer.am/?p=280335&l=am

Ազգային գրադարանային շաբաթ Հայաստանում
https://www.youtube.com/watch?v=geJxEJq8gDs

Հայաստանի գրադարանային ասոցիացիայի կողմից Հայաստանի Հանրապետության գրադարաններում ավանդաբար կազմակերպվող Ազգային գրադարանային շաբաթի շրջանակում 2017 թվականի ապրիլի 18-ին՝ հայոց բանակի կայացման 25 ամյակին նվիրված Շաբաթի մեկնարկին, ՀԳԱ նախագահ Ռ.Տոնոյանը և փոխնախագահ Ռ.Ղազարյանն այցելեցին Երևանի համայնքային գրադարաններ: ԱԳՇ-ի առաքելությանը հավատարիմ՝ գրքերի, ընթերցանության և գրադարանների արժևորման նպատակով իրականացվեց գրքերի նվիրատվություն:
Դեպի հայաստանյան գրադարաններ մասնագիտական շրջայցի ընթացքում նրանք եղան Շենգավիթի վարչական շրջանի №32 գրադարանում՝ «Հայոց բանակ-25» խորագրի ներքո կազմակերպված ԱԳՇ-ի պաշտոնական բացմանը, որը ներառում էր հեքիաթի թատերական ընթերցանություն, ժամանակակից փոխգործուն խաղեր և երեխաների մասնակցությամբ հանելուկ-գուշակումներ ու Շուշանիկ Կուրղինյանի անվան №17 գրադարանում՝ «Քեզ ծառայելը, հայրենի՛ք իմ վեհ, իմ որդիական պարտքն է սրբազան» թեմատիկ խորագրով հայրենապաշտության դասին, որն ուղեկցվեց հայ զինվորներին հասցեագրված մանկական նամակ-մաղթանքների ընթերցումով: Միջոցառման ընթացքում ասոցիացիայի առաջնորդները դիտեցին նաև «Փառք հայոց բանակին» խորագրով ցուցադրությունը, որը ներկայացնում էր պատանիների հայրենասիրության մոտիվներով ստեղծված աշխատանքներ:
Նշենք, որ ամենամյա մասնագիտական-մշակութային շաբաթի ընթացքում նախատեսվում են գրադարանային հիմնահարցերի քննարկումներ, հանդիպումներ, մշակութային տարեդարձներին նվիրված ցերեկույթներ և հանդիսություններ հանրապետության մարզային, համայնքային, մասնագիտական և բուհական գրադարաններում և պարբերական շրջայցեր դեպի հայաստանյան գրադարաններ:

ՀՀ մշակույթի նախարարության աջակցությամբ Հայաստանի գրադարանային ասոցիացիան 2017թ. ապրիլի 17-ից 23-ը Հայաստանի Հանրապետությունում կանցկացնի Ազգային գրադարանային շաբաթը, որն այս տարի նվիրված է հայոց բանակի կայացման 25 ամյակին:
ՀԳԱ-ի կողմից ավանդաբար իրականացվող մասնագիտական-մշակութային շաբաթի խնդիրն է գրադարանային հիմնահարցերի բարձրաձայնում, համակողմանի արդյունավետ ու համապարփակ լուծումների որոնում: ԱԳՇ-ն նպատակաուղղված է նպաստելու գրադարանների, գրքի, ընթերցանության և գիտելիքի կարևորմանը,  նրանց նկատմամբ հետաքրքրության խթանմանն ու դրսևորմանը: Շաբաթը միաժամանակ նպատակ ունի արժևորելու գրադարանների նշանակությունը հանրության կյանքում, որի ամենամյա կազմակերպումն ակնկալում է գրադարանների միջև արդյունավետ համագործակցություն, գրքի և տեղեկատվական ոլորտի աշխատակիցների ակտիվ ներգրավվածություն գրադարանային գործում, գրադարան-հանրություն կապի ամրապնդում և գրադարաններ հաճախելու մշակույթի ձևավորում: Թիրախային խմբերն են` ընթերցողներ, գրադարանային-տեղեկատվական և մատենագիտական ոլորտի աշխատակիցներ, մտավորականներ…
Ծրագիրը կմեկնարկի ապրիլի 17-ից «Հայոց բանակ-25» խորագրի ներքո: Ազգային գրադարանային շաբաթին իրենց առանձին ծրագրերով կմասնակցեն հանրապետության մարզային, համայնքային, մասնագիտական, ինչպես նաև բուհական գրադարանները՝ անկախ գերատեսչական պատկանելությունից: ԱԳՇ-ի շրջանակում գրադարաններում կանցկացվեն հոբելյանական հուշ-հանդիսություններ, քննարկումներ, հանդիպումներ, մշակութային կարևոր տարեդարձներին նվիրված ցերեկույթներ, մասնագիտական շրջայցեր դեպի հայաստանյան գրադարաններ, գրքերի նվիրատվություններ, այլ միջոցառումներ:
Ազգային գրադարանային շաբաթը կամփոփվի ապրիլի 23-ին: