Մեկնարկել է Ազգային գրադարանային շաբաթը, որն այս տարի անցկացվում է «Դպրոցական գրադարանները նորարարության տիրույթում» կարգախոսով։
Ապրիլի 13-ին Խնկո Ապոր անվան ազգային մանկական գրադարանում Երևանի դպրոցական գրադարանների գրադարանավարների համար տեղի է ունեցել «Գրադարանի արդի խնդիրները» թեմայով սեմինար-քննարկում։Սեմինարը վարել են գրադարանագետ, մատենագետ, Հայկական գրադարանային ասոցիացիայի փոխնախագահ Ռաֆիկ Ղազարյանը և ասոցիացիայի քարտուղար Մադլենա Հովսեփյանը։Սեմինար-քննարկման ընթացքում բանախոսները կարևորել են դպրոցական գրադարանների դերը՝ ընդգծելով, որ դրանք պետք է տեղափոխվեն նորարարությունների տիրույթ։ Միաժամանակ նրանք սեմինարի ընթացքում մասնակիցներին տրամադրել են անհրաժեշտ գիտելիք և տեղեկատվություն։Բանախոսներն առանձնահատուկ շեշտել են, որ դպրոցական գրադարանները չպետք է լինեն քարացած և միայն դասագրքերի վրա հիմնված, այլ պետք է վերածվեն տեղեկատվական և զարգացնող միջավայրի։Բանախոսների խոսքով՝ դրա համար գրադարանավարներից պահանջվում են բավարար գիտելիքներ և հետևողական աշխատանք։Սեմինարի ընթացքում գրադարանավարները ձեռք են բերել նոր գիտելիքներ, հնչեցրել իրենց հուզող հարցերը և բարձրաձայնել ոլորտում առկա խնդիրները։