Օգոստոսի 19-23-ը EU4dialogue ծրագրի շրջանակում Լատվիայի ազգային գրադարանի նախաձեռնությամբ իրականացվել է «Գրադարանը որպես համայնքի մշակութային հարթակ» խորագրով ամառային դպրոցը: Ծրագրի նպատակն էր գրադարանային ոլորտի մասնագետների փորձի փոխանակումը, մասնագիտական հմտությունների և կարողությունների զարգացումը:
Հնգօրյա դպրոցի շրջանակում մասնակիցները փորձի փոխանակման նպատակով այցելել են Լատվիայի 5 քաղաքների` քաղաքային և գյուղական գրադարաններ, թանգարաններ, մշակութային կենտրոններ: Մշակութային այս հաստատություններում ծրագրի մասնակիցներն անցել են 4 թեմատիկ վարպետության դասընթացներ` ձեռք բերել մասնագիտական նոր գիտելիքներ, կարողություններ ու գաղափարներ: Մասնակիցները նաև կապեր են հաստատել գրադարանային ոլորտի տեղի մասնագետների հետ, ինչը կնպաստի հետագա համագործակցության հիմքերի ամրապնդմանը:
Ամառային դպրոցի մասնակիցները հնարավորություն են ունեցել նաև ներկայացնել իրենց գործունեությունը և կիսվել փորձով։
Ելույթներով հանդես են եկել Խնկո Ապոր անվան ազգային մանկական, Հայաստանի ազգային գրադարանների և Հայոց ցեղասպանության թանգարան-ինստիտուտի աշխատակիցները: Խնկո Ապոր անվան ազգային մանկական գրադարանի զարգացման ծրագրերի և միջազգային համագործակցության բաժնի վարիչ Նաիրա Աճեմյանը հանդես է եկել «Մանկապատանեկան ընթերցանության խթանմանը Հայաստանում. Խնկո Ապոր անվան ազգային մանկական գրադարանի փորձը», Հայաստանի ազգային գրադարանի արտաքին կապերի բաժնի գլխավոր մասնագետ Ջուլիետա Աղաբեկյանը «Մատչելիության/հասանելիության բացահայտում. մատչելիության խթանում մտավոր սեփականության համաշխարհային կազմակերպության և ABC կոնսորցիումի հետ համագործակցությամբ. Հայաստանի ազգային գրադարանի փորձը», իսկ 《Հայոց ցեղասպանության թանգարան֊ինստիտուտ》հիմնադրամի աղբյուրագիտական ուսումնասիրությունների բաժնի կրտսեր գիտաշխատող Աննա Ղազարյանը՝«Հիշելով անցյալը` կրթել ապագան. Հայոց ցեղասպանության թանգարան֊ինստիտուտի ցուցադրությունը և գրադարանային գործունեությունը» զեկույցներով:
Հիշեցնենք, որ «Գրադարանը որպես համայնքի մշակութային հարթակ» խորագրով ամառային դպրոցին մասնակցում էին Հայաստանի 8 գրադարանների և մշակութային հաստատությունների (Խնկո Ապոր անվան ազգային մանկական, Հայաստանի ազգային, Շիրակի մարզային, Ավ. Իսահակյանի անվան կենտրոնական, ՀՀ ԳԱԱ հիմնարար գրադարաններ, Մաշտոցյան Մատենադարան, Մայր Աթոռ Սուրբ Էջմիածնի «Վաչե և Թամար Մանուկյան» Մատենադարան և Հայոց ցեղասպանության թանգարան-ինստիտուտ)` 10 գրադարանավարներ և մշակութային ոլորտի ներկայացուցիչներ։